向來地產界有些金句說來順口，但真確性令人懷疑，諸如「銀紙貶值、磚頭保值」（業主沽售物業獲利跑輸通脹的個案於多個樓齡較新的屋苑出現，本文不贅，而且只求銀紙保值可直接買iBond）、「建築費上漲，樓價無得跌」（小西灣藍灣半島2000年以「麵包平過麵粉」的蝕本價開售）。今年初樓價持續調整，發展商被問及後市前景時，通常報以一個標準回應「市場上仍然有剛性需求，相信樓價大跌空間不大」。至於樓市中的剛性需求，常被視作是新婚夫婦需要置新居而置業，但是否租樓就不配擁有婚姻？我對這種所謂的「剛性需求」有保留。同一時期，每逢新盤開售，記者與新盤買家訪問時，隔三岔五總會出現以下這種對話：
記者：「點解個市況唔係幾好都買樓？」
買家：「咁都要住㗎！」
記者：「其實呢，租樓都係有樓住啫。」
買家：「供平過租！租樓咪即係幫人供樓。」
記者：「會唔會擔心負資產呀？」
買家：「總之供得起層樓就得喇！」
聽到這類堅定入市的說話，除了令人聯想到發展商口中的「剛性需求」之外，我偶爾會憶起某毒舌好友A的一番話。
「香港人，邊度有逼切嘅住屋需求令佢哋一定要買樓啫！家陣有好多人無屋住咩？唔係呀嘛！唔買樓咪租樓囉，一樣有地方住㗎。咁點解佢哋身水身汗搞成日，過五關斬六將 ，拎住百幾萬等人地賣樓畀佢哋啫？因為佢哋計過條數，覺得長遠嚟講買樓抵啲，唔使再畀業主每隔一、兩年就加租，又或者焗住越搬越細。」
「佢哋計啱數咪賺錢、計錯數就要蝕錢，呢啲叫投資需求，而唔係咩居住嘅剛性需求。即係好似租金跌嗰時，你供樓嚿錢可以住大啲嘅地方，咁係咪蝕咗先。」毒舌好友A從無表明甚麼時間是買樓良機，只是再三重複，當買樓實際上是一種投資，日後一旦變成負資產便與人無尤，純屬個人決定。
記者：陳東陽