如果有得揀，識揀都會做李實發，邊個想做窮飛龍。自己用咗唔知幾多個月嘅人工，買咗隻IWC Big Pilot後，就係要提醒自己每刻都值千金。一個「玩錶拎」自白，都係提醒自己富人同窮人思想分別。
睇番IWC母企歷峰最新業績，高層次人嘅消費模式，究竟出現咗乜嘢高層次問題。奢侈品市場仍無起色，上月銷售仍按年跌18%，公司對未來幾個月睇得淡，包括中、港兩地嘅亞太區市場持續倒退，今年跌幅達雙位數。名錶銷售繼續跌，香港、澳門又再被提起，因為旅遊訪客出現結構轉型，內地反貪腐影響。下跌嘅理由聽到識背，咁中國市場表現又點？按年升26%。港、澳銷情落得慘淡，品牌整合同變陣一定要做。尤其香港租金逆市而走，本地名錶舖棄租或者關舖潮，家陣未見，只係時辰未到。睇番瑞士鐘錶今年首季出口數據，出口創2009年最大季度跌幅。3月份瑞士鐘錶出口亦跌16%至15億美元，五年最差。
名錶舖與其用清貨大減價吸客，覺得太低莊，高端客戶要用番高端吸客招數，可以考慮打正負利率旗號，儲錢喺銀行冇息食仲要罰息，倒不如拎錢出嚟買隻名錶仲保值。
Captain Cool
本欄逢周一刊出