噚日係一年一度渣打賽馬日，又係渣打香港大中華及北亞地區行政總裁洪丕正（Ben）出場嘅時候喇。Ben貴為渣打盃貼士專家，每年一出現都俾人圍住拎貼士，不過唔知係咪呢幾年太大壓力，今年畀貼士好「謹慎」，𠱁咗好耐先肯講。
話說舊年阿Ben貼咗3隻馬，最後真係其中一隻跑贏，而另一隻跑第三，貼士其實無山埃㗎！不過現場唔少記者朋友就誤會咗佢意思，好多人買咗個3隻馬嘅「單T」或者「位置Q」，結果咪輸咗囉！
話畀貼士好大壓力
所以Ben都講笑話：「每年呢個時候都承受好多無謂嘅壓力。」今年佢醒目啦，首先話自己睇好細號碼。不過得8隻馬，點叫做細呢？問多兩句，Ben先擠牙膏式咁話：「唔好買大過4號啦。」但在場一眾記者們又點會死心呢？追問下阿Ben終於講出口，話其實睇好1號「明月千里」、2號「威爾頓」同4號「將男」。至於結果就……真係4號跑贏嘅，而1號同2號就分別跑第3、4位，其實阿Ben嘅貼士都有啲保證，下年唔使咁大壓力啦！
除咗阿Ben、渣打香港行政總裁陳秀梅（May）之外，噚日現身遮打盃頒獎台嘅陣容可謂星光熠熠，包括港交所（388）主席周松崗、創興銀行（1111）副主席梁高美懿、恒隆地產（101）董事總經理陳南祿、希慎（014）非執董利子厚，和前經濟發展及勞工局局長葉澍堃。事關佢哋都係賽馬會董事，點都要去撐吓場嘅。唔知佢哋有無同阿Ben切磋吓貼馬心得呢？
李華華
mailto:[email protected]