滴滴出行獲得蘋果公司入股，原來係極速撻着㗎。滴滴出行總裁柳青近日接受美國財經網站CNBC訪問時形容，滴滴得到蘋果投資10億美元，就好似「極速約會（speed dating）」，因雙方冇幾耐前先至互相認識，但好快撻着，𠵱家大家合作仍處於非常初步階段。
柳青話滴滴與蘋果有好多共通點，大家都係透過移動互聯網做生意，客戶基礎亦有重叠，唔少滴滴司機與乘客都用iPhone同iPad，自然好啱key。
講到滴滴與蘋果嘅具體合作內容，如係汽車科技或Apple Pay等範疇，柳青就即刻好神秘咁，拒絕評論，淨係話可以發生嘅事好多。佢又重申，滴滴目前冇計劃去美國上市。至於會否向海外擴張，柳青又話唔講咁多嘞。