高調宣佈考慮參選立法會嘅港視（1137）主席王維基（Ricky），早前喺電台節目自爆婚姻狀況，話「已經處理婚姻狀態，正處理家事」，即刻令人提番起佢緋聞女友多，當中包括曾被人影到「撐枱腳」嘅紅顏知己香港總商會總裁袁莎妮。
Ricky噚日竟然毫不避嫌，選擇喺總商會會址舉行股東會。港視公關Jessie解釋，揀呢個地點，完全係出於成本考慮，指「公司蝕緊錢要慳啲」。
總商會會員租場有七折
佢指出，金鐘附近嘅酒店雖然方便，但場租比較貴，就算去到葵涌附近嘅酒店，亦要接近1.6萬元。咁啱公司係總商會會員，租場有七折，每小時3,600元，折咗之後租3個鐘都唔使8,000元咁話。
問到Ricky有冇親自向袁莎妮租場，Jessie就話「袁莎妮好高級，只係同事仔打去問」。咁下次Ricky應該親自去book場，睇吓有冇得再平啲喇，為公司慳多啲吖嘛。
講番港視股東會，小股東翁先生話，股東會上Ricky同佢哋講，參選立法會係誤會，佢只係考慮中。Ricky會後亦強調，只係考慮緊參選，亦「冇話完全放低（港視）」，即使參選都會「安排好工作」，等佢平衡個人、公司與公眾各方面利益之後，就會再交代。
查實Ricky由宣佈考慮選立會，到電台上自爆婚姻狀況有變，再加上噚日唔避忌咁揀袁莎妮做總裁嘅總商會開股東會，似乎都係有意將自己選立法會嘅消息炒熱啫。
李華華
mailto:[email protected]