民建聯立法會議員黃定光（圖）噚日喺教育學院升格大學嘅條例草案上，最後一關三讀時，竟然投下反對票，成為全場唯一反對草案議員。唔通黃定光好唔鍾意教院？象哥向八方承認錯誤，並向教院師生道歉：「錯咗就係錯咗，好彩（條例）通過咗。」佢解釋，自己投票時正閱讀有關邊境購物城工程嘅短訊，「一吓分心」投錯票。佢指，從教院升格大學嘅條例草案一開始審議，自己嘅態度一直係支持。被問到會否就投錯票一事，向教院師生說聲「對不起」，象哥話，希望記者代為轉達佢嘅歉意：「拜託你同佢哋講。」