喺領導人中排名第三嘅人大委員長張德江來港，建制派中個個見到佢都要和顏悅色，畢恭畢敬，無論張德江講乜嘢，個個都要大力拍掌讚好，連平日高高在上嘅國務院港澳辦主任王光亞，噚日都要做佢「裙下之臣」，飲張委員長口水尾，然後哈哈大笑。搵食艱難，明嘅。
張德江噚日去咗聖公會將軍澳安老服務大樓探訪長者，去到茶藝活動時，多位長者招呼張德江同梁振英坐低品茗，飲咗冇幾耐，冇得坐嘅王光亞就彎低身喺張德江身邊講咗幾句話，張德江之後將自己飲過嗰隻茶杯，交畀王光亞叫佢飲。王光亞二話不說，就一飲而下。
訪長者中心 送國產跑步機
兩個年過半百嘅大叔，非親非故，共用一隻杯。八方真係要借用馬逢國一句話「好唔健康、好唔衞生」。王光亞明顯被迫將張德江嘅「口水尾」飲落肚，仲要當冇事發生呢吓好嘢，同張德江哈哈大笑。
張德江向呢間長者中心送咗一部老人康復跑步機同一張電動按摩椅，兩件貨都係國產牌子，雖然同總理李克強訪港大時、送每年資助1,000名港大師生到內地考察及科研嘅金額差好遠，但心意嘅嘢係不問平貴，最重要係康復跑步機同電動按摩椅係中國品牌，而偉大嘅成龍已警告大家……
李八方
mailto:[email protected]