愛情至上的夢夢與道德行先的音音矛盾去旅行得來都算和諧，音音怕hurt親夢夢唔敢講唔敢鬧的，我哋嘗試正經地了解一下。正印vs第三者係愛情中恆常對立角色，近年唔少愛情後來者越趨高調，唔只夢夢，Mandy Lieu與洗米華的感情狀況更似連續劇成為唔少人茶餘飯後話題，以前尚且要有金屋藏嬌小三避席，何解o依家唔少女仔會咁大膽表明身份？香港心理學會註冊臨床心理學家趙思雅就話原來有三大原因。
一、傳統價值觀扭曲
根據政府數字，至2013年，本港離婚個案為19,508，其中任何一方或雙方屬第二次或以上再婚的個案有2,117個，比2012年嘅1,574個個案多出近三成，離婚又再婚似係平常事。當社會對婚姻冇咁認真同尊重，對男士而言離婚就唔再係罪大惡極之事。就算男方已婚，女方亦會覺得可以公平競爭，想要就去爭取，亦唔怕俾人知自己做第三者。經典例子有周焯華（洗米華）同Mandy Lieu，第二任「洗米嫂」陳慧玲同Mandy Lieu嘅「大鬥法」就曾經成為城中熱話。
二、宣示主權
當第三者早有計劃破壞男方家庭，公開宣揚自己身份地位就等於宣示主權，亦係迫令男方二揀一嘅方式。就似戴夢夢明知男友太極鼓手朱翰博（Ricky）同老婆未正式離婚，一樣高調晒愛，仲曾經被拍得同Ricky仔仔一齊三人行出街，有進佔主場之勢。
三、收入大於付出
揹住第三者身份一定有會有輿論壓力，但當得到男方肯定，又或者女方衡量過得到嘅經濟同感覺得着比所受壓力更多，自然頂得順。早排拉埋天窗嘅郭永淳同楊愛瑾（Miki），Miki曾經接受訪問表明二人喺男方辦理離婚手續後先拍拖，雖然多年來一直俾人話係狐狸精，但點解咁都支持到落去？愛囉。
記者：黃樂雯