正所謂人不要臉，天下無敵。電能（006）當年拆走港燈，答應股東如沒大型收購，會把套現所得派回股東。但年復一年，承諾從未兌現，長建（1038）更「出茅招」欲先併電能、後派息，意圖取得更多原本不屬於自己的現金，最終遭否決。唔順氣的長建主席李澤鉅在股東會上大講風涼話：「我話有好嘢食，提議畀你，你唔食，我食囉。」如此為人風度，令人大開眼界。
不過更令人開眼界的是，市場竟有聲音，連股東權益和管理層權責都未分得清，就讚美李公子多年為長建、電能股東賺咁多錢，電能股東卻只着眼「區區小利」，不願和長建股東「有福同享」，最後咪因小失大囉。
李公子所謂的「好嘢食」到底有幾好食？電能當日計劃派息293億元，如按各股東持股公平分派，持電能38.9%的長建可分得114億元，電能獨立股東可瓜分餘下179億元。
若按李公子方案，則遭攤薄的原電能獨立股東只分得104億元，少收40%；反觀原長建股東就可收近189億元，多收息75億元或66%！原來係李澤鉅自己想食好啲，但要電能埋單。
成日講到長建、電能是李公子私有產物咁，海迪想提醒各位，電能是上市公司，長建只揸39%股權，在李澤鉅英明領導下公司賺到錢，他是有糧出及有花紅分，不是股東欠咗佢㗎囉。去年李澤鉅在長建就收取2,800萬元花紅。
這宗併購如發生在西方，董事局出現逼宮都唔奇。只有在亞洲，大家習慣家族企業話事，管治水平低落，才有斯德哥爾摩症候群患者，盲目崇拜權威至邏輯都唔講，哀哉。
海迪