專欄作家左丁山噚日喺專欄度話，有朋友前年入過去中環街市，發現入面超多老鼠同白鴿，老鼠大隻到，放貓入去都可能招駕不住，講到咁恐怖，華華即刻走去請教市建局非執董周光暉，佢身兼中環街市復修及活化工作小組主席，應該同啲老鼠、白鴿好熟喇。
周光暉一聽見即刻笑住話，中環街市入面冇嘢食㗎，老鼠應該唔吼喇。佢跟住認真講番，指舊年食環署已經清理咗入面嘅老鼠，並進行消毒；至於白鴿就真係暫時冇辦法，因中環街市嘅設計問題，裏面養咗好多白鴿，佢哋冇計劃搵人捉走啲白鴿，暫時希望等到復修工程開始進行，到時沙塵滾滾、人聲鼎沸，或者可以令到白鴿自動飛走，另覓家園。
佢好認真咁話，想約埋左丁山去中環街市行一轉，如果可以嘅話，仲會搵埋市建局主席蘇慶和一齊去㖭，華華噚日未搵到左丁山，唔知佢有冇興趣深入鴿穴呢？