唔知大家仲記唔記得，2001年4月曼聯對拜仁嘅歐聯八強次回合，喺開波前竟然走咗個着住全套曼聯球衣嘅球迷落球場草地，仲影埋大合照，好多紅魔球員當時都懵然不知！估唔到喺日前英格蘭國家隊首課操練，又發生類似情況。有個球迷又係着晒「全副武裝」咁走咗入場，同三獅兵團一齊操練，最後俾軍醫發現先至趕佢走。據悉呢個球迷係富二代，因為爹哋係溫布萊俱樂部嘅會員先至獲邀參觀英軍操練；佢今次衝入場係為咗「博收視」，希望twitter有多啲followers喎！不過，佢咁做就好可能連累爹哋連個會籍都冇埋囉！