周三NBA季後賽，勇士憑住「咖喱仔」史堤芬居里（Stephen Curry）單節獨得17分，幫球隊喺第三節鎖定勝局，最終喺主場以118:91大勝雷霆，順利將總場數扳平1:1。
勇士追平1:1 居里踭傷無礙
大家咪見咖喱仔今場射入28分，幫勇士喺第三節將比數拉開至88:68就以為佢打得好輕鬆，其實佢今場都算係負傷上陣！當第一節仲有2分54秒時，咖喱仔為咗救波而飛身撲向觀眾席，點知附近嘅勇士迷唔單只冇即刻接實佢，仲有人趁機影相；雖然咖喱仔冇因此受傷，但佢喺第三節俾韋斯卜克（Russell Westbrook）撞低之後，撞到右手手踭即刻腫晒。咖喱仔喺賽後仲講笑話：「我覺得右手手踭上面好似有個網球咁腫！」不過佢之後都向球迷大派定心丸，話今次傷勢冇大礙。
雖然杜蘭特（Kevin Durant）轟入全場最高嘅29分，但當中只有六分係喺下半場取得，而佢全場仲有八次失誤，最終難阻雷霆以27分大敗。KD喺賽後好無奈咁話：「勇士派咗三個人夾擊我，我只係想傳波畀有空位嘅隊友；或者我下次俾三個人圍住，都係要堅持繼續起手。」