根據香港《道路交通條例》，逆線行車屬「危險駕駛罪」，最高可判罰2.5萬元及監禁3年，仲會被釘牌。套用落炒股票，逆市操作何止危險，直情係投資大忌，最高罰款係total loss，重傷被抬出場。
「沽空比率創1998年新高，咁多淡友，肯定有挾倉啦」，多淡友等於會挾倉，呢句話深入民心到，連打去電視台問冧巴的師奶、阿叔都識講。但換個角度睇，淡友大鑼大鼓行出來，是否等畀人挾？沽空比率連續11個交易日高於14%，本月至今沽空金額逾1,100億元，唔係計晒數、有充份理據，會否沽得咁狼？再者沽空好講timing，揸好倉最多輸機會成本，但借貨沽空的話，利息是逐日計的，橫行都唔掂。
美國加息預期升溫，港滙靜雞雞爬番上7.765之上，反映資金繼續流走，加埋下月英國脫歐公投，連大好友謝清海都唱淡大陸債務危機，表面證供睇唔到有挾倉的理由，宜逢反彈沽貨，順勢操作盡量保本。
個股方面，加息有利金融股息差收窄，帶動滙控（005）、渣打（2888）逆市向上，但若油價再瀉，其債務風險將再升溫，有貨宜趁高減持，抽ibond好過。
魏力
http://www.facebook.com/2012jason
本欄逢周一、五刊出