今年係雙數年，各地領袖要退任或為連任而參加競選：台灣馬英九夠鐘鬆人，民進黨蔡英文大勝上台，預料未來四年台北與北京關係緊張。菲律賓總統阿基諾三世任滿，任內雖然經濟增長良好，勝過頻有政治動亂嘅泰國，但菲律賓國內治安差劣，綁架案無日無之，於是一位民粹主義者，只識講強硬殺罪犯，不懂國家與世界大事嘅市長上台，以後出席東盟領袖峯會，唔知會唔會格格不入呢？假若特朗普贏到美國總統選舉，日後在APEC峯會與菲律賓總統碰頭，你估佢地會講靚女經還是講打壓外來人？
巴西總統羅諾夫被國會彈劾，不甘停職半年候查，指反對派等同發動政變；委內瑞拉經濟崩潰，總統馬杜羅指美國策動政變，宣佈全國進入緊急狀態，分分鐘以此為藉口，推翻國會，實行獨裁執政，菲律賓馬可斯總統在1970年代就試過呢一招，遺禍至今，害足菲律賓40年。總之凡係左派民選領導人不得民心，拖垮國家之時，佢地就會賴晒美國佬係幕後黑手。
香港都有㗎，本土激進組織見美國領事，即刻「被影相」，成為美帝打手，爛頭卒。殊不知，「換特首」之聲早已係大部份市民之心聲，你話香港市民會撐港獨，搵鬼信，但係反梁特？周街都有聲音。王維基（或佢之政治顧問）夠晒醒目，一箸夾中，從政政綱只有三個字，就係「換特首」，立即有無限咁多like，有位溫和派年青賓架講，今年七一遊行，佢好想蘋果日報附送一張尊子繪畫嘅「換特首」海報，等佢拎上街揮舞。佢在1989出生，嗰一年，肥佬黎主政嘅佐丹奴發售一款T恤，大賣特賣，上印六個橙紅色大字，就係：「您好，請您下來」，今年應該無T恤商人做同樣事情咯，但肯定有不少人會在七一上街嗌出「換特首」嘅口號。上流人物更加要出聲出力啦，試睇吓，林鄭月娥於佛誕到馬場頒獎，與人氣女騎師蔣嘉琦合照，馬迷拍手讚好。另一位司長曾俊華就在同日（星期六晚上）出席曹星如拳賽，大力捧場，現場透過fb直播，唔駛呃，都有大把like，多到數唔切；星期日早上，吓，梁特上幾friend嘅商台節目，大發議論㖭！係唔係我地小人物諗多咗呀？啲大人物邊度會冇諗過度過就出席公開活動，明顯係入閘前做熱身！