唔少政圈中人恨見領導人恨到流口水，全國政協常委、前政務司司長唐英年，就一連兩日請張德江「食檸檬」，前晚因「私人事務」冇去歡迎晚宴後，噚日又因主持佢新餐廳「江蘇薈」開張，再缺席張德江會見各界人士活動。
呢間餐廳咁得唐唐重視，來頭當然唔嘢小，唐唐話，餐廳嘅小籠包係「全香港最靚」，可能係「香港第一包」。個包有乜咁犀利？唐唐話好食在皮靚肉嫩，最正係個汁，用水魚裙邊熬，唔同出面嗰啲用豬肉，所以食起上嚟唔黏口。
唐唐hard sell可能大家唔信，但原來佢早喺上周日，已邀請咗食嘢刁鑽嘅「岳少」林建岳試食，仲引述岳少話好好食，「食足三隻小籠包」，匯豐亞太區副主席兼行政總裁王冬勝更即場交會費成為會員喎。