鋼琴大師劉詩昆，鋼琴造詣一流之外，原來投資物業都頗有心得，難怪中原地產噚日有分行開張都專登搵佢老人家同女友孫穎一齊去剪綵，劉詩昆亦藉機會呼籲政府減辣。
雖然近期樓市吹淡風，劉詩昆卻人棄佢取，淡市出擊，佢兒子早前先至動用1億人仔，投資加拿大物業。
劉詩昆指，「大仔因為辣招，轉去溫哥華投資」，意指樓市喺多項稅項綑綁下，資金向外流走，佢認為政府應該考慮減辣。
過往劉詩昆同孫穎等人曾出手購入豪宅，其中，上水天巒仍然持有3幢洋房，包括一期洛森大道兩間相連獨立屋，市傳現租11萬元。呢兩間相連獨立屋乃於2010年以超過7,500萬元買入，即是租金回報率只有1.75厘。
至於二期納沙泰爾大道一間由劉詩昆之子劉曉迎持有嘅雙號屋，現時以4萬元左右出租中，物業乃於2010年以2,311萬元買入，租金回報率亦只有2.1厘。