隨住內銀股光輝十年過去，當年睇住內銀上市崛起嘅一班老臣子，亦一一退下火線。市傳目前五大國有行中，最資深高管、工行（1398）董事長姜建清即將退休，彭博亦引述工行發言人確認，易會滿將會接替工行董事長一職。
現年63歲嘅姜建清係工行老臣子，執掌工行長達16年。佢早於1984年加入銀行，由櫃位員工做起，做到今時今日董事長一職，為工行奉獻32年青春。
五大行中，如果唔計姜建清，就得番建行（939）董事長王洪章最夠資歷，中行（3988）、農行（1288）同交行（3328）董事長嘅行長們全部未滿60歲。
內銀股以往的確有過一段光輝歲月，好似姜建清掌舵期間，由帶領工行完成股份制改革、到香港上市，再成為全球最賺錢銀行，絕對唔容易。如今內銀已經接近負增長，就好似當年打拼嘅一班老臣子亦開始要退落嚟，認真不勝欷歔。