意甲同樣喺周日煞科，兩位老將都以入球向球迷告別。拉素迎戰費倫天拿已經係例行公事，結果主隊以2:4慘敗；陣中37歲德國老將高路斯將會喺球季完結後約滿離隊，踢到74分鐘落後到1:4嗰陣，拉素獲得12碼，梗係交畀佢去處理，結果佢亦不負所託搞掂，射入為拉素貢獻嘅最後入球。高路斯賽後話仲未決定下一步點做，到底會掛靴、返德國定去美職聯搵食，要再諗諗先。
迪拿達利喊到變豬頭
至於烏甸尼斯前鋒迪拿達利同樣喺周日講拜拜嘞，烏甸喺主場1:2不敵卡比，呢位38歲老將負傷喺77分鐘入替，冇耐就有12碼射，同樣順利建功為烏甸破蛋，以入球向佢效力12年嘅烏甸作告別禮物。迪拿達利賽後話，感慨時光飛逝，喺更衣室喊到豬頭咁。至於賽前排18嘅卡比雖然喺煞科戰全取三分，但都救唔番，因為高佢哋一位嘅巴勒莫，喺同日另一場以3:2險勝維羅納，搞到卡比要陪同費辛隆尼同維羅納齊齊降班。