建築股盈信（015）今年5月9日建議分拆「建築及保養業務」再獨立上市，不過建議分拆仍處於初步階段，聯交所尚未批准今次的上市分拆建議。我有點覺得譁然，因為盈信分拆業務獨立上市早有兩個前科，分別就係怡益（1372）同雅駿（1462，現稱金誠）。而且，市場同媒體對於啤殼都有妖魔化傾向，聯交所局中人也是「做好份工」的打工仔心態，盈信見風聲咁緊仲玩呢味，真係有「雖千萬人，吾往矣」的氣勢。個人認為今次分拆一定比前兩次難，一定俾人問到飛起，如果今次真係分拆成功，咁盈信真係分拆啤殼之王，應該要成為商學院教科書的經典實例。
關於分拆多隻殼的原因，都係好官式的「釋放其業務對股東之價值」，呢類的講法都係FA工序化去寫出來，好抽象的，我懷疑起擬通告那位仁兄本身都唔知咩叫釋放價值。睇番盈信這隻股票本身，真係唔算差，2014年應佔溢利1.15億元，派息1仙；2015年賺1.34億元，派息5仙，7倍PE，0.5倍PB。傳統的基本因素去分析，盈信係幾好，而且股價被低估。不過，做建築真係冇乜大特色，市場跟嫖客一樣，個個花心，見VR科技搞得好，就去炒相關概念；見fintech好炒，又去分一杯羹。Fama講的效率市場理論（Efficient Market Hypothesis）跟現實不符，基金、散戶唔多buy，就唔會買。
所以，釋放價值就要行第二條路，就係將業務分拆。只要你一有企業活動，市場就會再留意你，因為no news is bad news，有嘢搞先有嘢睇，而且業務一分拆獨立上市，就變相多了平台多了流動性，把資產、業務價值收窄，亦即係「賺了殼價」咁解。睇番怡益和雅駿，最後都係一年禁售期後以全購方式賣了畀大陸佬。怡益以全購價3.2334元賣給姜建輝，過程又派0.25元股息，賣得相當王道；另一隻雅駿則賣給金誠及寧波和澤潤等等要約人，也是全購方式易手，兩者都畀足當時市場上的殼價，甚至更多。因此，母公司盈信無法自己反映價值，藉住分拆賣殼去把價值釋放在子公司上，雖然繞了門子，但子公司分拆起持貨的股東無人不賺錢，這也是人人都贏的局面，我相信這兩個案例也可能被考慮用作同聯交所角力的論點。
渾水
http://www.facebook.com/muddydirtywater