唔知奇誠庸着起軍裝個樣，有冇宋仲基咁型呢？呢位27歲南韓中場要趕住返祖國服兵役四周，所以今日就幫唔到史雲斯披甲鬥曼城，相信哥迪奧拿聽到呢個消息就最開心嘞！史雲斯少個大將，曼城贏面大啲，咁佢下季有得帶歐聯嘅機會亦大啲。講返奇誠庸先，原本佢要服兵役兩年，但南韓隊喺2012奧運表現出色，贏咗銅牌，所以當局就將班球員嘅兵役減到四星期。「天鵝」領隊古度連就話佢想奇誠庸個暑假長啲，反正史雲斯季尾又冇嘢爭，所以就早啲放佢返南韓。