領展（前稱領匯）於2004年12月搞上市時，有長者盧少蘭申請法援，以司法覆核方式，阻止上市，官司打到上終審法院，盧婆婆敗訴，立法會方面，自由黨、民建聯、工聯會、民主黨等都支持領展於2005年11月25日掛牌上市，受股民熱烈歡迎，又受基金垂涎，股價一直反覆向上，成為收息人士、退休基金嘅穩定收益愛股，近日股價（即基金單位價，為方便書寫，稱之為股價）約係每股47.2，比IPO價9.78元升咗5.03倍，比上市第一日收市價11.8元，升咗4倍，領展上一年度派息1.828元，息率3.87%，低於其他同類地產信託投資基金，但不少投資者係早期買入唔放嘅，如在2005年以12元入貨，今日嘅股息收益率高達15.2%，非常和味啫，點捨得放手呀，譬如曹Sir生前對左丁山講過，佢對某一間大學嘅最大貢獻就係勸該大學嘅基金大手買入領匯（領展823），一路收息收到笑。
股民愛領展，政黨就恨之入骨，譬如社民連梁國雄等人就年年去搗蛋，社運人士亦視領展為罪大惡極，令頭腦發燒，瘋癲到要求政府回購領展，點解呢個諗法係儍嘅呢，以今日領展市值計，高達1059億元，如政府事先張揚要回購，股價必然上揚，特區政府要以溢價買晒，動用千三、千四億毫不稀奇，你估特區政府真係有一萬億未開頭咩，如果肯動用千三四億買領展，點解唔用呢筆錢嚟興建十間大型醫院，保障市民醫療健康？買領展重要還是全民健康重要？啲社運人士唔好癲到燒壞腦。
又有較醒目人士話要處處限制領展，引用競爭法去砌佢，好呀，假如競爭事務委員會係一個大白象機構，得閒冇嘢做，養住班閒人，咪試吓去用法律挑戰領展囉，千億元上市公司其實老早有律師團隊諗清楚。經營權範圍內之法律問題，幾難俾競爭會突襲偷雞成功嘅，否則CEO一定要辭職下台，競爭事務委員會用納稅人嘅錢去打官司，事先最好諗清楚有冇把握先。又有一些人話採取撤資（divestment）行動，要大學及有良心基金（即一般CSR基金）不要持有領展股票拋售之，一於杯葛佢，等佢股價下跌到冇人買。世界上當然有CSR基金早已不買煙草股、煤炭股、石化股等等，但還未成氣候，領展亦不是十惡不赦嘅罪惡股（vice stock）。股價一旦下跌，大把人會趁低吸納，杯葛領展股票喎，香港人幾難聽得入耳。