今球季英超到聽晚終於大結局。神奇封王嘅李斯特城，喺煞科戰將會作客車路士，對於領隊雲尼亞里（圖）嚟講真係別具意義，大約12年前佢被車路士辭退，終於「衣錦還鄉」。不過雲尼亞里就已經心無怨念，今次返史丹福橋球場，只有愛。
藍軍轉死性同泰利續約
雲尼亞里喺2000年接手執教車路士，成績唔算好失禮，不過油王阿巴莫域治喺03年入主，雖然雲帥喺03/04球季帶領車路士喺英超拎到亞軍、歐聯亦打入四強，但季後都難逃被炒命運。
雲尼亞里離開車仔之後，11年嚟喺唔同國家執教過，到今季終於返嚟英超，周日煞科戰更以英超冠軍領隊身份返史丹福橋。班主無情但車迷有愛，雲帥仍然得到車仔球迷愛戴，周日比賽將會獲掌聲歡迎。
講到回歸史丹福橋，雲帥話：「04年我喺班球員嘅祝福下離開，今次返嚟竟然有同樣嘅對待，真係夫復何求，更加唔會有所謂報仇嘅諗法。我好清楚領隊工作係咩一回事，有時候班主要求變，只係因為你已經冇辦法同佢夾得埋。」03年將車路士賣畀油王嘅前主席碧斯，據講聽晚都會嚟到同雲帥聚聚。另外，射手占美華迪啱啱領咗本年度英格蘭足球先生獎項，英格蘭領隊鶴臣亦拍心口話會預埋佢踢歐國盃。
車路士炒領隊不留情面，對忠臣又何嘗唔係咁無情。原本球會唔打算同泰利續約，不過事情竟有轉機。車仔周五宣佈願意同泰利續約一年，只等泰利同意就成事。