近年喺公共事務上越嚟越活躍嘅華置主席劉鳴煒，初頭畀人嘅形象嚴肅，睇佢2012年陪唐英年選特首時，成個G4咁款就知啦。眾所周知MW同佢爸爸劉鑾雄嘅關係似乎唔及同媽媽寶詠琴，佢噚日接受商台陳志雲訪問，罕有真情剖白佢同爸爸、媽媽嘅關係，仲講咗一件至今仍後悔嘅事。
MW喺訪問入面，講到過咗身嘅母親時盡顯柔情。佢話自己10歲時父母離婚，一直同媽媽居住，所以同媽媽感情較親密，劉鳴煒原本喺香港讀國際學校，但係媽媽寶詠琴1994年癌症復發，結果16歲嗰年佢選擇去加拿大升大學，就係想跳級，希望早啲大學畢業讓媽媽有生之年見得到。
與父互不干預
佢又記得當年赴美探望接受治療嘅媽媽，乍見媽媽病到樣都變咗，當時好震驚，唔使十秒喊咗出嚟，之後決定去外國升學，因為覺得除咗同阿媽打氣，好似冇嘢可以幫到，惟有做好自己，冀盡快大學畢業了卻媽媽心願。
陳志雲問MW，如果媽媽再出現喺佢面前，佢會同媽媽講乜，MW話會講「我愛你」，因為佢永遠都有少少後悔，媽媽在世時自己唔多識用言語表達愛。
至於爸爸大劉，MW話爸爸點樣過生活係爸爸嘅事，只係如果大家做咗啲直接損害到對方嘅事，「出句聲應該呀」，不過最盡都只係出句聲，對方唔改都唔會再干預。咁係咪講到同爸爸好切割呢？其實又唔係，爸爸咁有錢，MW話有好有唔好啦，唔好嘅就係被標籤富二代。至於好嗰方面亦正因為佢係有錢仔，世人對佢期望低啲，所以有更大發揮空間，加上喺人脈、資源上都比人有利，所以好好利用嘅話可以有好多好事發生。
李八方
mailto:[email protected]