世上只有媽媽好，說來老生常談，事實便是如此；當媽媽辛苦，當在職媽媽更辛苦，當身嫌多職的單親媽媽苦上加苦，而育有一對年幼子女的Remy，正職做保險，入不敷支，最近兼職工作較彈性的Uber司機，被乘客認為表現勝過男司機，子女更視媽媽為英雄，「成日叫同學仔過嚟『坐我阿媽車』，又話『媽咪嗰手車係最舒服』」。
記者 蔡朗清
32歲單親媽媽Remy，分別育有一對7歲兒子及12歲女兒，從事保險工作，一個人養一頭家，母兼父職，為了增加收入，開了3年車的她，半年前加入Uber做兼職司機，業內女司機不多，最初被客人質疑她的駕車能力，「啱啱做嗰陣，啲客一上車就話好少見有女司機，質疑我手車得唔得；其中一個貴婦仲話我唔熟路，點知落車嗰陣，竟然讚我手車好定，好過啲男司機，更加話啲男司機渣平治、渣寶馬，fing到佢嘔；我聽佢咁講，好安慰，嗰一刻我好想喊。」
Remy車上備有樽裝水、餅乾、朱古力、糖果、腸胃藥、白花油，「見到啲客上氣唔接下氣，咪畀支水佢飲；有啲客上車就話餓咗好耐，我就畀包餅佢食；有啲客等車嗰陣被蚊咬，一上車我就畀白花油佢搽。啲客即刻對女司機態度改觀，仲話女司機真係唔同啲。我就同佢哋解釋，因為我係人哋媽咪。」更有個肥仔乘客留言說：「『好正嘅一次trip，又有嘢食，又有水飲，又有靚女車』，真係好搞笑。」
Remy接載五湖四海的客人，當中9成9是女乘客，以熟客為主，有接載學生上學，有癌症病人往返醫院，有經常喝醉的女乘客指定要她，「又有一個有玩開car仔（小型賽車）女乘客，話我手車好掂，撩我一齊去玩car仔。」
身兼多職，留家時間減少，年幼子女見不到媽咪當然有怨言，Remy不斷調節工作時間，盡量晚上9點收工，早上趁她們還未起床便開工，「我應承咗對仔女周六、周日唔開工，畀師兄話黃金時間唔開工，我同佢哋講，有啲嘢係錢買唔到返嚟。」
Remy頭號粉絲是她的仔女，儘管工作疲累，Remy提起仔女，以高出8度的聲線興奮地說：「個女叫同學仔過嚟坐阿媽車，又話阿媽部車好大架；又有其他人比較，覺得媽咪嗰手車係最舒服，好搞笑。」
今個周日母親節，Remy需要駕車，但是接載的乘客是她一對寶貝仔女，一起兜兜風，「之後就返屋企一齊BBQ。（有沒有母親節禮物？）咪就係一年一度嘅學校母親節勞作囉。」Remy說時笑不攏嘴。