1948年，一張香港飛往雪梨的國泰機票賣2,200港元，那是一個甚麼概念？記得先父復元之後趕回香港到中華電力報到復工，每月薪資只有幾十元，到了六十年代中，會考畢業生入政府做初級文員嘅月薪係350元，相比起嚟，1948年嘅二千二百蚊就係相當貴族化嘅價錢。美國1948年嘅每年平均薪水就係2,950美元，高出香港好多。
以今日國泰機票價衡量，68年來增幅甚微，貴族旅遊已變成平民旅遊，香港大概只有一樣嘢可以保值升值嘅，就係樓價。在船塢里太古檔案庫，睇到一張新樓價單，就係太古城第一期翠湖臺鄱陽閣，28樓連天台（建築面積678平方呎）只售18萬7千5百元，呎價277元，一樓售15萬5千5百元，呎價229元，時維1976年，當年左丁山月薪2,800元，做銀行研究部主任，要交稅供養父母交租交通費等等，冇首期資金買樓，咁就走晒寶。推算番轉頭，今天太古城樓價升幅40餘倍，人工就遠遠追唔上咯，銀行主任何來有月薪十一萬、十二萬呀。
負責管理歷史檔案，要有專門技術及學識，太古歷史檔案庫經理施清女士話香港嘅大學冇呢方面課程，現時檔案庫內有兩名僱員在大學主修檔案歷史管理，係從英國請返嚟嘅，佢自己正在攻讀英國大學嘅遙距課程，有人覺得檔案學悶到暈，施女士話佢最初由公共事務部借調過去參加籌辦工作，因自己平時對歷史紀錄好有興趣，一啲都唔覺得悶，全力投入籌辦工作後，更覺得好好玩，例如從一啲40年前照片中，只認得一位年青女士係鄧蓮如，其他人呢？竟然從平時唔起眼，睇完就唔要嘅「太古通訊」內搵到姓名職級，例如彭勵治。過往數十年嘅太古通訊，現在就成為資料寶藏。檔案庫內有嚴格溫度控制，紙皮盒特別由德國進口，先至合乎最高標準。
參觀太古檔案庫完畢，就輪到自己結束顧問公司，不再營業，於是乎來個大清理，二十年嘅積存檔案剪報大量丟棄或銷毀，唔捨得都冇辦法，小型企業邊度有能力向太古學習呀！
清理之時，在剪報底下有一個黑膠袋，裏面有張1967年11月14日出版嘅學聯報，已經發黃破舊，頭版新聞係新亞學生會大選，競爭激烈，港大學生會競選，楊永強自動當選；大學四角辯論賽，聯合書院禤福輝、陸鴻基、馮祿德擊敗港大吳靄儀、何文匯及許鞍華奪標。
秘書話：「掉唔掉呀？」卒之都係留番，恨不得自己有檔案庫呀！