早排好多本土派網民拎本民前梁天琦參選新東做例子，質疑啲新興政團點解要籌過百萬去選9月立法會，不過選舉事務處噚日公開梁天琦選舉開支申報，原來佢都用咗超過75萬，捐款都收到逾51萬，連黃毓民揸旗嘅普羅政治學苑都有捐助，不過最神奇嘅係，佢申報嘅開支仲包括文件銷毀、買電油同大批電話卡。
暴露騷亂之夜行蹤
根據選舉事務處公開嘅資料，梁天琦申報共逾51萬捐助，除咗普羅政治學苑合共捐出逾9.7萬外，最大手筆嘅捐款係來自一位叫Lam Aileen嘅人士，呢位人士前後捐咗近18.2萬畀梁天琦，另一大戶叫做劉可恩，合共捐咗15萬，至於普羅就係捐物資、節目時間等，價值都成9.7萬蚊。至於每筆唔超過1,000蚊小額捐款都有近7.2萬，吸金能力真係不容忽視。
逾75萬選舉開支入面，最大筆數係廣告，差不多使成50萬，仲有唔少相當罕見嘅開支，例如佢不時會買電油，有時仲幾支幾支咁買，有次連偈油都買埋，佢申報時就形容呢項係「選舉輔助工具」。
此外，佢仲有項1,400蚊嘅「文件銷毀」開支，主要係選後銷毀咗140箱文件，睇番梁天琦提供嘅開支單據，發現佢喺2月8號夜晚旺角騷亂前幾日，買咗3部平價智能電話同埋10張俗稱太空卡嘅電話卡，到8號晚7點佢喺土瓜灣一間快餐店食咗900幾蚊嘢之後，夜晚8點半同埋9號凌晨就喺砵蘭街一間便利店買過飲品，9號凌晨3點幾就坐過的士。睇怕梁天琦冇諗到，呢堆申報單據變相公開咗佢嘅行蹤。
李八方
mailto:[email protected]