周四NBA季後賽東岸四強，速龍孖寶洛利（Kyle Lowry）同迪洛桑（DeMar DeRozan）雖然齊齊死火，夾埋以不足35%命中率射入38分，但喺前鋒D卡萊爾（DeMarre Carroll）發威入21分下，加時以96:92險勝熱火，追平場數1:1。不過，熱火控衞積格斯（Goran Dragic）就慘啲喇，周五30歲生日嘅佢喺第二節尾段俾迪洛桑打到爆嘴，縫完六針繼續奮戰下轟入20分，包括第四節最後10.5秒入三分波將比賽拖到加時，但最後都唔可以用勝仗做生日禮物。