今期第三場沈集成馬房四班馬「超強快駒」上仗跑谷草一哩，在潘頓胯下慢放帶到開齋，3歲馬初跑中距離即勝，實在唔簡單。拼後冇缺課，操足個幾月，等本周三(4日)同班同程再戰，當然鬥志十足。
「超強快駒」較特別係今仗唔用潘頓，換上雷神莫雷拉，同場潘頓改策四戰谷草一哩全落第嘅「邦之星」，老實講，無論係潘頓揀騎「邦之星」，抑或佢被飛冇得再跑「超強快駒」，計牌面始終「超強快駒」穩陣得多。
今朝雷神過檔「超強快駒」，試草地跳兩段，晨操專家積奇話隻馬身壯毛色靚，步伐有力，勝後成熟狀態再進。而沈集成亦好緊張，一早喺機坪等隻馬操完返嚟，眼定定吼實「超強快駒」嘅神態，又捉住雷神問長問短，擺明對今戰高度重視。
睇番沈集成及雷神，今季快活谷合作18次，得11冠2亞3季，勝出率逾6成而上名率更近90%，咁超強嘅數據，大家對「超強快駒」應該放心喇啩！