今年巴郡股東會特別受到注目，小弟嘅關注點有兩個，第一，股神講到巴郡市賬率跌至1.2倍以下就會加注回購股份。根據彭博資料，目前巴郡市賬率大約1.41倍，即係跌15%，巴郡就再重注啲回購。巴郡股價走勢向來跟標普500指數等等嘅主要美股指數差唔多，齊升齊跌，原因係巴郡本來持有唔少美國大型企業，可以話同美國經濟着住同一條褲。
巴郡股價低15%，佢就覺得可以加注，現價又點？可理解成股神認為現價far from expensive。基於巴郡股價緊貼美股指數嘅特性，可以大膽假設，畢菲特對於美股睇法冇大差別，同樣認為far from expensive。
呢兩年美股喺高位徘徊，目前非常接近歷史高位，假如股神覺得呢一刻美股唔貴，牛市理應會升到去一個真正貴嘅水平，先有機會見頂，咁即係股神有信心美股破頂。
另外，股神重申銀行同保險商擁有大量衍生工具係危險嘅事，其實佢兩年前已經講過，冇新意，重提因佢呢一刻冇乜新嘢要擔心。有人覺得畢菲特近年着重買資產嘢，係防守、係睇淡，小弟又唔係咁睇，佢保守，或許係唔想繼任人他朝亂買嘢，而作為有責任嘅一着，資產股能為股東及繼任人提供充足新現金流去投資。目前唔少人覺得美股太貴、港股太爛，大條道理做淡友，但可能係同股神做對家。
晉佳
http://facebook.com/advanceguy1