李易達馬房自3月16日憑「八運」、「海之濤」、「沙角威龍」中三元兼達標後，已13個賽日食白果，但原來他靜靜起革命，本周三(4日)初出馬「勝利日」會戴眼罩出賽，另一場的廐侶「合一」則在港初戴眼罩上陣，要留意兩駒在外地贏馬時均有眼罩。
第六場三班1000米的「勝利日」最値得一提，來港前在澳、紐共6戰，兩次戴眼罩全勝，4次冇眼罩則全落第，於2000米三級賽馬拉華度經典賽中，冇眼罩兼排不利的14檔，耗力切入放至終點前百多米才力弱，只輸三個幾馬位，嗰場亞軍係在港連勝打吡及女皇盃的「明月千里」，可見水準不差。至於2100二級賽冠軍錦標一役，「明月千里」獲勝，「勝利日」則跑第五，賽後「勝利日」騎師甘銘輝話隻馬根本唔係長途材料，有獎金已算唔錯。
「勝利日」在港多次戴眼罩試短途大閘，都顯露上佳速度跑入前列，加上初出有新鮮感，今仗爭1000米未必嫌短，何況有個戰無不勝嘅眼罩，插入三班上陣更不可輕視。