阿里巴巴嘅合夥人制度不獲港人欣賞，結果阿里前年去咗美國上市。內地藝人兼創投基金明嘉資本董事長黃曉明近日就話，佢好欣賞阿里嘅合夥人制喎。
唔少內地藝人演戲之餘，走去搞投資，黃曉明係其中之一。佢接受《財新網》訪問時話，自己多想法，並需要一個團隊去實現。
佢相信，成功到好似阿里主席馬雲、萬達董事長王健林都會面對同樣問題，因為大家都唔係神，需要有一個團隊。佢仲非常欣賞阿里嘅合夥人制度，希望將來可以搵到合夥人與優秀人才幫自己。
至於佢挑選合夥人嘅標準，佢就話，希望吸納有志向同有才華嘅年輕人。
黃曉明喺訪問中又透露，已故金像影帝保羅紐曼係佢嘅偶像，因為保羅紐曼同時係一位成功嘅投資者，佢希望自己將來一樣成功。而黃曉明旗下明嘉資本已成立逾一年，投資超過3,000萬人仔。