政務司司長林鄭月娥會唔會「更上一層樓」？大家都拭目以待，而無論最終係咪入閘，熱定身軟銷下亦無妨。林鄭噚日接受商台陳志雲訪問，由兒時艱苦生活講到考第四會喊爆可能係心理有啲問題，再憶述大學兩大「污點」，包括參加社運走得前，同民主黨單仲偕、李永達當時係一夥，以及考AO前半年仲喺政總外靜坐，幸而冇影響仕途。喺官場打滾36年嘅佢話最有成就感嘅係社署署長一職；如果他日成為香港首位女特首，會唔會更有成就感？
訪問由兒時生活講起，林鄭自言基層出身，家住唐樓冇電梯、廁所冇沖廁、更加唔係扭開水喉就有熱水啦，所以時至今日最令佢快樂嘅事，係返到屋企可以沖個熱水涼。五兄弟姊妹，佢係第一個入到大學，由細到大都考第一，試過小學一次期中考得第四，佢已經接受唔到，喊爆收場。陳志雲問佢最終點止到淚水呢﹖佢話：「因為我考返第一。」
原本諗住讀理科做醫生
考第四都要喊，係咪心理有問題？志雲大師膽粗粗問咗句。林鄭笑言「可能有啲」，又話當年中學選科，覺得叻人要讀理科做醫生，後來會考理科科目考得麻麻，反而歷史、英國文學就有好成績，所以到預科就轉讀文科，做唔成醫生變咗今日好打得嘅「局長奶媽」。
林鄭話一開始冇諗過考到政務官，皆因佢喺港英年代有兩大「污點」：大學年代活躍於社運，又組織香港大學學生去北京清華大學交流，「我係副團長，李永達同單仲偕都係我團員」。佢明言當時對社會問題感到不安及不滿，但選擇喺建制內改變。做唔做到呢？佢話：「如果我唔覺得做到，我唔會留到今日。」
李八方
mailto:[email protected]