現年31歲嘅餅碎傅穎（Theresa）噚日喺觀塘擔任藝術節嘉賓，自爆有個感情穩定嘅「隱形男友」，不過佢就話唔恨嫁，暫時以工作為重。男友點睇被迫隱形？Theresa就話：「佢覺得好笑囉！我哋拍咗拖一段時間，我每次拍拖都係以結婚為前提。」Theresa仲開咗結婚期票，可以等到35歲先結婚。
Theresa又主動澄清早前指被富婆包養嘅報道，佢話：「其實佢係我公司一個partner，嗰個女仔Andi細過我，被人寫40歲好慘。」呢位Andi噚日都有到場，仲大方同Theresa合照。
會同Miki拍戲
餅女楊愛瑾（Miki）同永安太子爺郭永淳大前日拉埋天窗，鄧麗欣（Stephy）同吳雨霏（Kary）都有出席，但Theresa就未獲邀請，佢就話：「有同佢聯絡恭喜佢，嚟緊會有齣戲一齊拍。」Theresa又否認喺Miki結婚日專登貼健身相示威。Miki正式成為郭太，佢噚日就喺Instagram貼咗張同老公嘅婚宴相，感謝親友祝福。
撰文：馮仁昭