飛天朱並非普通一位72歲長者老人，係大有來頭嘅，但豹隱多年，恆常輪流在三藩市灣區、香港、及北京超豪四合院小住，享清福，都唔知幾爽，由於多年冇出鏡，新進記者都唔認得佢。
為乜飛天朱突然間石破天驚，參加機場靜坐，指責梁特首及家人「用特權」？識佢多年嘅朋友，諗極都唔明，畢竟佢曾經係全國政協、人大，有此身份，點都要俾番幾分薄面梁特，即使知道實情，都可以唔出聲嘅啫。
左丁山與飛天朱識於微時，識咗之後，知道佢係何添女婿，知道地位差好遠，那敢與佢行得太埋吖，何況佢讀過美國東北大學，MIT，哈佛MBA，學歷顯赫，在銀行與我地班中大友做同事，算係屈就，果然唔夠兩年就俾怡和招聘做董事助理，跟住就外調做金門建築常務董事，與我地由見習生做起，在銀行慢慢等升級嘅情況相距好遠，直情拋開我地九條街。但短短交往之中，知道大衞朱（後稱飛天朱）係性情中人，不拘小節，全無架子，略欠深思熟慮，入政壇搞政治並非佢嘅長處。
有人對飛天朱指責梁特之言，半信半疑，左丁山睇過報紙匯載之機管局、國泰報告之後，覺得飛天朱真係可能啱喎。「明報」（4月26日）引述報告最詳細，等我地知道逐分鐘事件發展。表面上，特首未必施壓使用特權，但其中兩點，報告輕輕帶過，不提詳情，第一點，3月28日0時12分，「梁頌昕在登機閘外等候期間將電話遞給國泰職員，梁振英在電話內詢問事件進展，職員遂向他講解。」呢個電話講咗幾耐呢？雙方對話內容係乜呢？報告冇提。第二點，3月28日0018，國泰職員從梁太手上取回行李……跑往登機閘口，0019，「梁太就行李的處理手法，向機管局、國泰及保安公司表達不滿，在0時53分，梁太離開。」普通阿媽，知道阿女找回手提行李，在00:25登機之後，頂多囉囌幾句，有教養嘅，就向在場職員講幾次唔該，thank you，仲唔打道回府？但梁太從0019至0053共44分鐘，表達不滿究竟講過乜，語氣如何？報告不提。係唔係飛天朱所言不虛，有職員聽梁特或梁太之言，聽到流眼淚呀？梁太非一般阿媽，阿女登機後還有心情在機場留多28分鐘，幾神秘莫測。