記得當年睇《Reminiscence of a Stock Operator》，有一句說話好深刻。主角喺炒股初期被問：「你想賺硬（sure money）定大賺（big money）？」
呢期，相信大家都感受到國家印鈔機之氣場，淨係睇對上幾個禮拜大陸嘅螺絲鋼，你仲以為大陸及全球房屋供應非常緊張，所以會全球大興土木？
當時，中央知大陸經濟差，公司唔夠現金流還債，所以印鈔。點知爆超級走資潮，人民幣跳崖。所以國家落閘放狗，唔畀錢走。當香港爆零售寒冬時，國家領導就知收效，所以瘋狂印鈔了。
白銀價料一路飆升
好啦，呢隻資金盲牛亂衝，如今大家要賺，要做嘅就係估究竟衝去邊。不過講衝去邊之前，當然要講唔會衝去邊先。首先，都好肯定唔會衝去股票先。就算係股票，都會係A股先，而喺2014年，大陸都要升咗好鬼耐先到香港嗰個曇花一現大牛市。所以比較難明港交所（388）點解可以咁高。
大陸一線城市嘅樓舊年升到甩轆，今年應該去啲存貨，地勢比較難起樓嘅二線城市。當然，你走去買，得。不過賺咗都攞唔到出國。所以順理成章，都係買啲大陸人可以買的，不過價格會牽動全球。呢樣一定係商品。
之前大陸炒到飛天嘅商品，就係啲大陸需求或供應有支配能力嘅嘢。不過見油價都比今年2月低位彈七成半時，仲有好多商品要鬥落後。
我首選當然係白銀。首先，佢之前衝破好耐都升唔穿嘅每盎斯16美元，一穿就飆到一年高位嘅每盎斯17.75美元。上周五就連呢個位都穿埋，下步就係每盎斯18.7美元附近。如果由今年低位學油價升七成半，就會見每盎斯24.8美元。我就長揸實貨白銀，你就都係就精面咁炒，不過今次買白銀真係既賺硬兼大賺。
孫柏文
獨立股評人
http://facebook.com/shuen
本欄逢周二刊出