內房有政策支持，由2014年底起開始轉勢，但偏偏行業習慣以極高速「中國式增長」，賺到盡方式，硬將原本轉向慢板發展的樓市引擎撻着，不少房企高層都暗嘆房企未來兩年都會難捱。
最近和內房管理層閒聊，佢話舊年個市好好，今年book到條數會靚，咁今年人人賣樓仲人人加到價，自然似好好景。但佢話，實際食晒未來幾年條水，好似一些三、四線地區，唔係無錢賺，啲賣唔出嘅樓都清了好多，但要重新扔大大嚿錢去嗰批城市就唔會囉。
其實記者都明，唔大唔細嘅內房都想投資一擊即中，但你估人人係李嘉誠咩，輸咗走唔到就話，但走又去得邊？去一、二線省會又未必夠臂力同人爭，搶到個價好高，畀你爭贏都無肉食，唯有咬住手上以前攞番嚟，成本勁平嘅地先，睇定啲先出手，成條雞肋咁樣。
大陸二線以下城市有幾麻煩？睇下首季地方GDP，大陸媒體話彈番晒，但實際靠地產支撐住，好像呢輪地產已去到高位，當然未來兩至三季效應仍持續，但效果能撐幾耐，真係好難講。
加上每個月官方公佈的數據，都是較知名城市，中國地大物博，難保會低估三、四線庫存量。市場一直認為政府收緊一、二線城市，但一定會堅定不移持續支持三，四線城市，但當見到龍頭地區交易腰斬大跌，樓市有價無市時，就算再多政策支持，對入市意欲都有影響啦。
近期見到有隻房企的三、四線城市項目都同人合作，當然夾住做規模大啲，多元化啲，但由獨資做到夾住做，通常只係一、二線貴地出現，依家連三、四線都咁開發，相信係想投資風險細啲。
之前有管理層講明，今年會係分水嶺，叫記者多啲留心毛利率走勢，在今年同上年大家加到價，賣得到情況下，今年仲繼續跌的公司，內部應該就有少少問題啦。最終輸家係邊個？好快有分曉。
記者：方楚茵