【本報訊】香港有33萬外傭，過去僱主多透過中介公司聘請工人，隨互聯網普及，標榜直接聘用外傭的網站興起，兩個港媽看準需求，推出首個中文外傭配對App，僅一個月已有800名僱主及外傭登記。有老牌連鎖中介公司承認，外傭網站影響生意，會改良網站應戰。
記者：呂麗嬋
現時全港約有1,500間外傭中介公司，傳統上僱主想搵工人會透過中介公司配對，但渠道單一，選擇有限。曾嘗搵人難的港媽盧嘉敏認為此生意大有可為，與拍檔何美寶開發首個外傭配對手機應用程式HelperLibrary，讓僱主及外傭上載招聘告示及求職履歷，打破傳統招聘模式，何指「等於你以前去旅行會參加旅行團，今日會自由行，自己上酒店網同機票網格價，除咗慳錢，最重要係選擇多，自主性強」。
透過視像通話面試
求職資料庫分搵人及搵工兩介面，僱主登入App即可瀏覽待聘外傭資料，包括照片、家庭狀況及經驗等，系統會根據僱主填報的要求，自動配對待聘工人名單，並即時傳送確認，雙方若意合，可透過視像通話直接聯絡、面試，「平台嘅好處係雙方都有得揀，有啲僱主接受唔到工人問佢住邊、有冇獨立工人房，其實你自己搵工，都會問老闆係邊個，透明度高，可減少因期望落差而出現嘅磨擦，對雙方都有好處」。
盧嘉敏稱配對能否成功，取決於待聘工人數目，基數越大，僱主選擇越多，故她近月頻密到中環及銅鑼灣等外傭聚集地區設街站，又透過工人組織辦講座，解釋App使用流程，吸納完約及冀搵工跳槽的家傭登記。
現時不少英文網站亦設類似配對服務，由曾任職銀行的法籍媽媽Laurence Fauchon創辦的HelperChoice，月前亦加推配對功能；網站AsiaXPAT設外傭專頁。
中介代辦簽證驗身
自助聘請外傭網站湧現，得成僱傭中心董事總經理廖翠蘭承認對生意有影響，「近年只要求代辦簽證同驗身嘅僱主大幅增加，𠵱家差不多佔我哋營業額嘅一半，有部份係外傭自己介紹姊妹畀僱主，有部份係僱主自己喺網站搵到心水，叫我哋代辦手續」。由於網站簡化了前半部份的配對工作，僱主找到適合人選後，透過中介公司代辦合約，如以得成現時收費為例，套餐由7,000多元至9,000元不等；自行透過網站配對，可節省三至四成。
廖承認新的招聘平台方便，互動性強，成大勢所趨，集團亦已經改良網站應戰，但也指「唔使我哋介紹，咁梗係唔會收你介紹費，慳咗幾千蚊，至於係咪值得？僱主自己衡量，你透過我哋搵工人，有乜問題，至少我哋會幫手跟進，我哋喺當地亦有職員，確定工人完成培訓同經過面試合格，先會引入，你自己上網搵，係咪好似履歷寫得咁好，又或者你識唔識得點去面試，都係問題」。