周日NBA季後賽，黃蜂（圖右）喺東岸首圈Game 7全場都處於下風嘅情況下，作客以73:106不敵熱火（圖左）。即使黃蜂班主米高佐敦（Michael Jordan）同柏賓（Scottie Pippen）齊齊入場打氣，都係幫唔到手。
熱火控衞積格斯（Goran Dragic）射入全場最高25分，「白邊哥」韋西迪（Hassan Whiteside）亦貢獻出「雙雙」10分12籃板，真係將黃蜂打到毫無還擊之力。不過今場只得九分嘅主將K獲加（Kemba Walker），就為黃蜂今季嘅表現自豪：「我哋今季好多傷兵，但係球隊都可以克服重重難關，打入季後賽。」
勇士居里第三戰或復出
見到黃蜂一直處於下風，坐喺VIP包箱睇波嘅MJ就一直都愁眉苦臉咁，不過佢昔日老拍檔柏賓玩驚喜突然出現，心情即時變得勁靚；好可惜呢對一齊贏過六次總冠軍嘅拍檔唔可以為黃蜂披甲上陣，只可以望住球隊被熱火大炒33分。
熱火主帥史普利斯查（Erik Spoelstra）賽後就向黃蜂致敬：「黃蜂由Game 3一口氣連追三場，先會迫到我哋打出更好嘅表現。」熱火晉級東岸四強後，將會硬撼同日以89:84險勝溜馬、成功「搶七」嘅速龍。而常規賽一哥勇士喺西岸準決賽首戰亦順利擊敗拓荒者，據報主將史堤芬居里（Stephen Curry）有機會喺第三戰復出。