窩輪牛熊證市場個餅越做越細，落廣告嘅budget本來已經買少見少，有輪商坦言，「傳統媒體已經唔值呢個價」，所以唔少廣告開支，撥咗去新媒體，令到電台與報紙廣告量跌得較明顯，「老實講，𠵱家坐地鐵，仲有幾多人拎報紙？又有幾多聽電台？好多都係用手機煲劇。」
有輪商話，相對報紙，電台吸引力仲要低，除咗收聽率走下坡最明顯之外，目標客群都唔多啱，「莫講年輕人，40歲以下仲聽收音機嘅已經唔多，剩低嘅又有幾多會玩窩輪牛熊證？」反而網絡廣告接觸到嘅客群就大得多。
除咗新媒體，新電視台原來都係一大競爭。另有輪商指出，𠵱家落廣告渠道多咗，輪商就廣告嘅議價能力都大咗。好似有電視台之前重整節目兼加埋廣告費，即刻有輪商卻步，結果係連本來預好嘅廣告時段都賣唔晒。