「資深股評人」陳永陸（陸叔）呢個星期開始，早上可以全程睇實股市炒股嘞，事關佢早上10點至10點半嘅商台節目被cut，原因竟然同窩輪市場由盛轉衰有關。輪商近年汰弱留強兼cut budget，搞到陸叔早上嘅節目冇贊助商，惟有拜拜，不過佢下晝仲有一小時講股節目。
對於早上節目被cut，陸叔認為係商業決定，在商言商亦合理。話說當年，陸叔離開大福證券（現稱海通，665），就開始幫商台主持下午嘅講股節目「人生交叉盤」，至今已經有17年。其間去到2005年，輪證市場開始活躍，有輪商主動要求贊助商台嘅新財經節目，於是陸叔就做埋10點節目。
高峯期有4個贊助
去到2006年中，牛熊證推出，輪證市場炒賣更熱鬧，陸叔幾自豪咁話「2007至2008年高峯期，我早上半小時嘅節目，有4個輪商贊助！」
可惜金融海嘯後成個大浪湧埋去，就變成另一回事，輪證市場雖然保持到一定成交，但輪商嘅經營成本增加，相繼退出市場或cut budget。輪商數目由高峯期29間，到家陣得番11間比較活躍，包括瑞銀、摩通與瑞信在內，頭五位嘅市佔率去到8成。
陸叔好坦白咁講，早上節目由今年初開始已經冇贊助商，咁同一時間，有贊助商願意出錢贊助其他類型嘅節目，作出變動都好合理。
雖然陸叔早上唔使主持節目，但唔會走咗去飲茶，佢話都會睇實股市，為下晝節目做準備嘅，呢個時段多廣告，佢會一直做落去。
商台首席智囊陳志雲就錫住陸叔，指調整節目，主要係見到社會上，需要一啲發放正能量嘅節目，將來唔排除邀請陸叔早上再主持節目。
李華華
mailto:[email protected]