做生意或者公司搞上市，最重要講包裝，識得修飾嘅話，單車都變摩托。新近有間總部喺廈門嘅海產公司「大洋洲綠色」申請上市，其中一項主要產品叫「海洋休閒產品」，大家估唔估到係乜東東呢？
大洋洲綠色嘅產品主要以「沃豐」做品牌，按初步招股文件，有項「海洋休閒產品」佔舊年收益6.6%，查實佢即係OL零食，好似烤魚片、魷魚絲、手撕魷魚片、香酥小黃魚乾、香燜馬面魨咁。一歸納做「海洋休閒產品」，係咪即刻好高級呢？
公司最賣得嘅就有乾海產，即係墨魚乾、干貝，佔收益58%。其次係紫菜、海帶、香菇等等，佔31%。公司上市集資所得資金，主要用嚟賣廣告、買機器生產紫菜多糖、紫菜醬油同紫菜醬等新產品。
「沃豐」曾經幾次被內地當局抽查發現，出產嘅浸酒料及響螺片，含有不符國家藥典嘅成份，又或者含過多亞硫酸鹽，被罰款同賠償2,000蚊至5萬蚊不等。家陣公司已經停產浸酒料同響螺片嘞。