《明報》執行總編輯姜國元上周突然以「節流」為由被辭退，《明報》幾個專欄作家接連開天窗抗議。喺特首梁振英治下，連建制中人講多兩句唔啱聽嘅說話，都被噤聲。
話說人稱「西環契仔」嘅立法會議員謝偉俊（Paul），早前喺地區掛橫額，寫住「香港須改，特首要變」，點知有傳「一男子」連呢句話都容不下，結果一陣大風由西環吹來，咪要換橫額囉。
唔知阿Paul係咪唔忿氣，噚日facebook竟然學《明報》專欄作家開天窗（圖）。佢將個人資料相移除，留番個「天窗」，封面相片就白底黑字寫「特首在Banner在 特首變Banner變」、「編者案：特首不變 謝偉俊Banner不變」。八方問過阿Paul，佢話呢排興有不滿就要開天窗。佢話因為有地區樁腳覺得張banner（特首要變）行得太前，所以都係收一收先，但團隊度咗橋，出唔到都有意見，咪用呢個方式（fb開天窗）表達吓：「我性格係唔會放棄爭取空間，要喺鳥籠內爭取擴闊空間。」