特事特辦事件再成為網民二次創作熱門題材。有網民貼咗條片，係網上化妝達人Joshi Fu教大家點樣化個「689妝」，超重口味。
其實呢條「689仿妝教學」片係Joshi Fu於今年1月，想提早「賀一賀」網絡23條不日通過而製作。Joshi Fu喺片入面逐個程序教足，首先，重點要用陰影粉由面部外圍掃向內圍，打造有層次嘅黑膚色；重中之重係額頭同兩邊額角，總之印堂發黑就啱；法令紋亦一定要加番深。
梁特另一特色係佢個向天鼻窿，呢部份要用深灰色眉粉嚟勾畫，尤其要喺鼻翼旁邊向外畫個「C」字。至於雙眼就用同樣深色嘅眼影掃落眼皮、淚溝，眼眉就要前幼後粗。
化完之後個樣，實在非常令人想犯罪呀！話時話，成段片嘅旁白同字幕係完全唔夾，字幕部份亦好精采，用上唔少粗口寸爆梁特及一眾高官。八方唔方便喺呢度講，大家上YouTube睇( http://www.youtube.com/watch?v=snLI3BfPLes )。