沙田區議會轄下嘅文化、體育及社區發展委員會噚日開會，13項議程只係傾完第一樣就流會，肯肯定係泛民又搞抗爭啦！不過泛民區議員拒絕承擔責任，仲話呢次係建制派專登製造流會喎！
話說委員會噚日有一項議程，就係成立節日慶典工作小組同埋康體發展工作小組，前者負責籌劃沙田區嘅慶回歸及國慶活動，後者就做文化、體育及社區發展。
民主黨沙田區區議員李永成、丁士元話，開會嗰陣泛民議員比建制派多，班建制派為免兩個小組嘅主席位落入泛民手，於是喺傾完第一個項目，即係康文署交代完今個年度嘅工作計劃後，就砌詞不滿政府嘅表現拉隊離場。
丁士元仲鬧爆建制派做得肉酸，事關傾康文署工作計劃時，建制派為表不滿經已提咗個動議，泛民都有份支持，點知一傾完，成班建制派就好齊整咁拉隊走，仲唔係唔想畀泛民做小組主席？睇嚟建制派以後都冇資格再批評泛民搞流會喇。