近年日本熊本熊喺香港大熱，唔知美心旗下元氣壽司係咪受到啟發，新近推出一隻「代言熊」，名為「雄一（別名Yu-Kun）」吸客。
元氣噚日介紹呢隻代言熊畀大家識，雖然雄一同熊本熊完全唔同樣，但身形就差唔多，都係肥頭耷耳，佢喺店內行來行去嗰陣，仲會卡住屁股。雖然佢論論盡盡咁，但就好識做，表情多多，擺晒pose，十分可愛。
據元氣介紹，肥嘟嘟嘅雄一除咗喺概念店同大家見面，以後仲會成為公司facebook嘅專頁管理員，兼會靜靜雞去不同分店同粉絲互動。
雄一亦去咗日本拍處女電視廣告，內容好有港味㗎，片中，雄一同香港人一樣，遇到唔過海的士、OT冇補水，仲慘豬豬買唔到樓㖭！