矛盾去旅行成熱潮，盛傳ViuTV添食，由觀眾提議組合。計我話，沒有嘉賓比思歪更適合，試問有誰比終日自製矛盾、今日打倒昨日的人更矛盾？對手呢，首選詩雅，其偽ABC口音，跟番書女頌昕同聲同氣。戴頭盔，以下純粹模擬流程，思歪連詩雅絲絲入扣，未開拍先興奮。
（模擬節目流程）
G4築起一字形人牆，促成是次見面禮。「梁生，我係詩雅。Well，唱歌之外我都鍾意acting。」羞怯，不是震懾於思歪氣燄，而是平生第一次見到一班「馬德鐘」。「叫我梁特首。爛gag嚟，I can fly one day！」思歪嘗試扮friend跟年輕人交流，反令氣氛尷尬。往機場路上，詩雅只顧篤手機，沒瞄過他一眼。
鏡頭一roll，詩雅交戲。「去親旅行，我都鍾意plan ahead！去之前都有做research。」但認叻怎及思歪：「我差不多每星期都搭飛機，飛行里數可圍繞地球80個圈。」面對厚面皮高手，詩雅索性收起偽裝笑容，直接check in入閘。「Oh my god，我隻Minion喺出面！冇得攬住佢sleep！」隨即向思歪撒嬌：「可唔可以用privilege，即係咩？特事特辦？」思歪嘴角微戚：「我留意到機管局過去曾以courtesy delivery方式，將失物帶入禁區，可惜我係唔會幫你。」
月入九千略有盈餘
登機一刻，詩雅才驚覺自己不是去意大利：「明明ITALY stands for I Truly Always Love You，點解變咗去敍利亞？」思歪氣定神閒說：「為配合國家一帶一路政策，我會安派年輕人去沿線國家作文化交流。至於SYRIA stands for乜……你唔需要知。」詩雅堅嬲：「Shoot You Right In Airport嘛，你想我rest in piece呀？唔拍啦！」
幾番唇舌，兩人才肯繼續拍攝。思歪提議體驗貧窮生活：「我扮演月入九千多的洗碗工，努力工作，勉強略有盈餘！」詩雅說：「初初入行三年，都係窮到燶，試過日日食麵包。」「仲可以食麵包當午餐，再游20分鐘水減減壓。」思歪在話語權上有upper hand，有點飄飄然，竟自薦用手語互問問題。但礙於身份，他沒有問對方是否處女，只在自己胸膛前比劃一下，意指「有冇隆胸？」詩雅答沒有。輪到詩雅問，竟做出同一動作，意指「有冇僭建？」思歪臉色一沉，僅示意「無可奉告」。
節目完結前，問兩人這趟旅程有甚麼得着，思歪搶答：「今次了解到年輕人需求，亦明白一帶一路嘅重要。」詩雅靜思一會，凝重望着鏡頭：「Although我經常扮ABC，好似好港女，but當你看完節目，你會明白真正乞人憎，係語言偽術，唔係偽語言術。」
完
慌張西望
撰文：杜秋棠@抽水站
原諒我只是一部國產抽濕機。
https://www.fb.com/freakingwestlook
本欄逢周五刊登