一間公司想做大，就會好似《食神》入面嘅史提芬周咁講：「我會先開分店，一間變兩間，兩間變四間。」大如投行瑞銀，喺IFC二期已有辦公室，最近亦過海到尖沙嘴北京道一號另開新場，噚日正式開幕。
對比IFC，呢度感覺冇咁高，但對正維港，擁有無敵海景，加上設計開揚，除咗有一間好闊嘅會議廳之外，多個會議室都望到海，又有酒櫃，放置多種紅酒與威士忌，格調優雅。
瑞銀財富管理大中華區主管盧彩雲（Amy）話，新場空間比較大，所以可以搞好多活動，例如係試酒會、烹飪班，特別日子仲可以舉行「煙花之夜」，畀唔同客戶聯誼，摸住杯底傾生意，講經濟前景。咁佢講嘅客戶，當然都係入場費不菲嘅貴客喇。
Amy都話，見到住九龍嘅企業家冇咁在意個人財富管理，所以過海開寫字樓吸客。