何韻詩喺芬蘭險遭性侵的經歷，聽完都令所有女仔：真。係。好。驚。80後作者Loklam上年出書《Working Holiday去邊好？德國吖，唔該！》講述咗自己同朋友兩個女仔窮遊德國一年的經歷，截順風車、做沙發客等「高風險」活動全部做勻，其實都唔係無驚過：「其實呢啲事（性騷擾）去到最安全地方亦可能發生，最緊要警性高啲，有試過去外國朋友家玩，他們飲大兩杯便越靠越近，又有啲暗示，我哋見唔妥就借機走人」。
Loklam仲教咗絲打幾招外遊防狼法，大家不妨參考參考：
1. 一個背囊ko
一個女仔去旅行行裝最緊要輕便，最好一個袋可以裝晒所有行李，12-15Kg左右，孭住都仲跑到，咁就就算有人對你不軌都可以即刻拎袋走！再掛一個防狼器鎖匙扣响背囊，有咩事即刻扯出來可以發出巨響，未有人即刻救你都起碼先嚇倒對方。
2. 感覺古怪即逃
去到陌生住宿環境，感覺屋主或設備有古怪唔好怕尷尬「覺得可能外國人都係咁」而唔敢走，反而應該即刻離開，唔好俾唔愉快事情有機會發生。
3. 衣著忌太暴露
唔使唔化妝，不過衣著簡單輕便加對波鞋最好，一來唔會引起對方色心，二來衣著乾淨整齊又係要逃走起嚟都跑得快啲！
4. 十問九唔應
外國經常有陌生人行埋嚟撩你傾計，覺得對方不友善、有可疑或者總之令你不安，唔出聲唔應急步走最安全。Loklam亦有朋友試過在男女合住的青年旅舍多人睡房，在睡夢中被一男子壓住，朋友唯有以被蓋頭同包實全身，男子見女方沒有反應不久就離開了。
5. 鎖鑰狼牙爪
有次Loklam在外國請途人帶路，走過一條又長又暗的街，於是拿出一揪鎖鑰，把每條夾在每個手指罅之間擺出「鎖鑰狼牙爪」陣，以防對方有任何不軌企圖可以即時「出拳」，幸好那次帶路的是好人，但這一招的確嚇窒帶路者，大家可以在有危險時使出！
記者：容慧心