【本報訊】恒地（012）西半山天匯首個銀主盤昨日拍賣，事前一度因準買家拒絕受訪，不欲曝光，拍賣一度驚現流拍。擾攘一輪，大批記者最後逼於無奈困密室，隔牆聽證拍賣過程。
「得罪TVB都冇辦法」
拍賣昨日下午3時開始，早半小時已有傳媒守候，有天匯準買家生怕曝光，向拍賣行表示，若傳媒拍攝，將離場不買，嚇得該行負責人要求在場十多名記者到密室等候結果，並不准拍攝準買家進場及拍賣過程，期間一度擾攘，該行董事蔡漢陞一度怒斥：「唔准影！就算得罪TVB，都冇辦法。」
其後傳媒無奈進入密室等結果，殊不知與進行拍賣房間僅一塊薄牆之隔，結果伏於牆身聽足全程。天匯銀主盤開價9,800萬元，每口叫價200萬元，承接到1.08億元，每口叫價調低至50萬元，惟無人承接，拍賣官問最後出價人：「畀多50萬元得唔得？」該出價人回應：「畀多20萬啦，我請你飲咖啡。」拍賣官接着道：「畀多10萬得唔得，今次我請你飲咖啡。」最終買家肯畀多10萬元，以1.083億元投得。記者向拍賣行證實買家身份時未有回應。