還有4個月便卸任的港姐亞軍龐卓欣，傳不滿被無綫投閒置散而計劃於今年8月卸任後不與無綫簽約，轉行教小朋友唱歌。昨日龐卓欣偕有米男友孫智威（Solomon）現身銅鑼灣出席韓國彩妝品牌moonshot活動，被問卸任後是否不再跟無綫續約，龐卓欣說：「未必，有機會自己都會喺呢個娛樂圈，但係咪簽TVB就未知。」
認捧ViuTV場
是否公司不准拍拖？龐卓欣說：「唔係，自己唔一定要行其他人行嘅路，佢哋亦冇話唔畀我拍拖，自己想創新一下，例如做YouTube channel教人唱歌。」對於傳被無綫投閒置散，龐卓欣說：「簽咗嘅人會捧，我未簽，大家都係互相了解中，自己想諗清楚。」
龐卓欣表示若不簽無綫的話會考慮其他電視台：「呢個娛樂圈咁大，未必一定要係TVB。」問她有否睇ViuTV，以及會否覺得ViuTV節目較精采？仍是港姐的她竟力撐對家說：「ViuTV適合年輕人，好似《G-1格鬥會》幾好睇，佢哋題材好睇好創新。」自己會否想拍？她說：「嘩，佢哋打到好樣衰喎！其實我太貪靚，都唔會囉！不過《跟住矛盾去旅行》都好睇！」
男友全力支持
問Solomon是否支持女友時，他說：「佢做乜嘢我都完全支持，由佢踏入香港小姐嗰一刻，都已經支持佢。」可為女友被投閒置散感不值？他說：「佢熱誠係喺創新度，佢覺得唔適合，我都支持佢，唔會因為TVB唔理佢戥佢唔開心。」龐卓欣揚言有興趣參演真人騷，問她會否情侶檔上陣？Solomon笑言怕醜，龐卓欣謂：「OK㗎。」
採訪、攝影：羅慧敏